Na serie Los carbayos n’Asturies falemos yá del quercus robur y del quercus pyrenaica, pero güei vamos rematar esta parte de la cadena sobre aquellos robles que muden la fueya. Esti últimu carbayu ye’l quercus petraea llamáu na llingua común carbayu albar, anque quiciás tea más estendío’l llamalu rebollu albar. Como recordaréis tradicionalmente los falantes d’asturianu y los d’otres llingües nun siempre estremaben les especies -o polo menos a pesar de les pequeñes diferencies nun les entendíen como variedaes distintes- asina que ye vezu atopase con nomes intercambiables pa una especia o otra.
Fueyes, flores y abeyotes del carbayu albar (quercus petraea).
El nome específicu d’esti carbayu, petraea, remanez del axetivu llatín petraeus: “que medra ente les piedres”, y alude a la tendencia d’esta especie a vivir en llugares más pedresos que la Q. robur. El fechu de crecer en lleres ocasiona que nun siempre llogre desenrollase curioso, siendo ésta tal vez la razón pola que delles veces seya confundíu col rebollu. De cualquier manera, nos más de los casos trátase de robles nobles con un tueru mui altu y rectu (más maderable) y ye que la pallabra albar refierse precisamente a la bona calidá de la madera. Asina que lóxicamente toles especies de quercus y otros árboles que presenten estes característiques nel so tueru podrán llevar esti axetivu. Los que non, delles reciben l’apelativu de villanos (anque tamién curcu, corcoxu…).
Puede algamar los 35 m d’altura, con una corteya parda o buxa tirando al blanco, non tan quebrada como n’otres especies. Les fueyes tienen llóbulos redondos con un contornu cola forma d’un güevu allargáu que van estrechándose en cuña. El rabín que les axunta al tallu (peciolu) ye bastante llargu, d’hasta 2,5 cm. Mas la mayor diferencia col Q. robur ye que, na xuntura del nerviu central colos llaterales del aviesu, cuenta con pequeños pelos (non tantos como nel Q. pyrenaica). Les abeyotes son ovoides, nun tienen pedúnculu (rabín) y tán cubiertes por un garrapiellu pobláu por munches escames con forma plana.
Vive na cordelera cantábrica hasta los 1800 m formando polo xeneral mases amestaes xunto a fayes (fagus sylvatica) o abedurios (betula pendula). Nel Reinu de Llión ta presente nos valles del norte (Ḷḷaciana, Forniella o Riaño), pero ta ausente nel restu de la provincia de Llión, Zamora y Salamanca a escepción d’una pequeña mancha en Santibañes (el conceyu la mio familia paterna). Compite colos fayeos en superficie, pero gana a éstos cuando hai menor humedá ambiental, como por exemplu nel occidente d’Asturies. Ello ye que se convirtó nel emblema de la viesca de Munieḷḷos (Cangas del Narcea) al ser la masa de carbayos albares mayor de la Península Ibérica y una de les más importantes d’Europa. Munieḷḷos perteneció a los condes de Torenu y hai noticies del emplegu de la madera d’estos carbayos na reparación de l’Armada Invencible, pos trátase d’un roble mui afayadizu pa la construcción naval. La pequeña desventaya ye que tien un crecimientu enforma lentu, polo que na silvicultura ye sustituyíu pol carbayu americanu (quercus rubra).
Carbayos albares na viesca de Munieḷḷos (Forografía: Denis Soria).
El carbayu americanu (quercus rubra), como delata’l so nome, nun ye una especie autóctona. Procede del noreste de Norteamérica onde lu suelen llamar carbayu coloráu del norte pa estremalu del carbayu coloráu del sur (quercus falcata). Históricamente compite colos robles del país na fabricación de moblame de calidá y especialmente de barriles de vinu. Nel País Vascu ye una especie mui estendida debío a les repoblaciones de principios de sieglu (recordemos que la cornisa cantábrica taba mui deforestada por mor del usu intensivu de la tierra). Anque n’Asturies nun tien muncha presencia cuntamos con dalgunos sotos de repoblación, dellos asilvestraos, que pudi constatar n’Andía (El Franco), Palombar (La Ribera) y en Ḥuensanta (Nava). Ye perfácil d’identificar poles sos fueyes grandes, con llóbulos fondos y mui puntíos, que pela seronda tomen una color encarnada intensa. Les sos abeyotes son redondes, tienen un garrapiellu deprimíu y allúguense nes rames, embaxo les fueyes. La mayor peculiaridá ye qu’entarden dos años en madurar.
Denis Soria 