Collaboración cola revista Evasões (Portugal)

Si enantes fora Fugas, suplementu del diariu Público, agora’tis otra revista de viaxes portuguesa –Evasões– la que dedica unes páxines a descubrir Xixón ente los sos llectores. Evasões tien una trayectoria independiente de más de 18 años y dende 2015 Global Media Group incluyóla como suplementu mensual de los periódicos Diário de Notícias y Jornal de Notícias. Trátase de la mayor revista d’ociu de Portugal, con una tirada d’unos 100.000 exemplares, abarcando dende actividaes turismu nacional y internacional a propuestes de vagar (vida nocherniega, restaurantes, vinos, espectáculos…).

Portada del artículu n’Evasões (Fotografía: Gerardo Santos)

Nesti tiempu nel que mos replantegamos tanto’l tipu de turismu que queremos captar, vienen de ponese na picota eses invasiones bárbares que vienen a quemar a les nueses muyeres, a matar les nueses colleches y a violar al nuesu ganáu. Pela cueta, el perfil del turista portugués’tis muncho más discretu y desapercibíu, con unes motivaciones más culturales y desprendíes económicamente. Bien lo pudi comprobar acompañando peles cais más llambiones de Xixón al periodista João Mestre y al fotógrafu Gerardo Santos, persones de fácil conversación mui interesaes nes coses más llígrimes de la nuesa cultura, lloñe de los tópicos.

Ello’tis que me supunxo una sorpresa a medies lleer l’estupendu artículu de João onde escoyó, de forma esclusiva, el nome xenuín de la nuesa playa –San Llorienzo- en cuenta del deturpáu inda que mayoritariu San Lorenzo. Pero igual que nel artículu de la revista Fugas, sopelexóse tamién la intrahistoria de los xentilicios playu y culu moyáu, o los nomatos d’escultures de sobra conocíos ente tolos xixoneses como El Cagaderu de King Kong o La Lloca del Rinconín. Ye verdá qu’otros como El Cerro de Santa Catalina por cuenta del tradicional La Talaya guardaron nel papel una identificación más dificultosa, pero esos nomes que recurren al humor intelixente y a la fala propia creen un códigu personal al tiempu qu’abiertu a les sorrises y al interés de los visitantes. Un universu particular regáu con muncha -pero que muncha- sidra.

Como se vio, esi’tis’l troféu que non solo los portugueses y les nueves tendencies vienen a cazar; el valir de lo auténtico.

Advertisements

Dexa un comentariu

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s